BAGUIO CITY – Nakemmeg ti maysa a restaurant owner kalpasan a naaktuan dagiti kameng ti Crime Detection and Group (CIDG) – Baguio nga agiserserbi dagitoy iti karne ti aso iti pangananda sadiay Km. 6, La Trinidad, Benguet idi kanikadua.
Nabigbig daytoy a ni Alexander Galut, adda iti legal nga edad bayat a nakalibas ti asawa daytoy kabayatan ti operasyon.
Sigun kenni SPO2 Veronica Villareal, panakangiwat ti CIDG-Baguio, impasidong ti Animal Kingdom Foundation iti surveillance ti nasao a panganan kalpasan a nakaawatda ti report nga agiserserbi iti karne ti aso ti nasao a panganan.
Kinunana a kalpasan a napaneknekan ti foundation a pudno ti naawat dagitoy a report ket dagusda a nakikoordinar iti CIDG-Baguio para iti panakakemmeg dagiti mangideldeliver iti naparte nga aso iti nasao a panganan agingga nga insayangkatda ti nasao nga operasyon idi kalman.
Innayonna a kabayatan ti operasyon ket inkagumaan ti suspek nga imbelleng dagiti karne ti aso ngem nakumpiskarda ti dua nga ulo ti naparte nga aso ken naluto a karne a para kadagiti kostumer.
Naibalud metten ti suspek iti Benguet Provincial Jail ken sumangsango daytoy kadagiti kaso a panaglabsing iti RA 8485 wenno Animal Welfare Act ken RA 9482 wenno Anti-Rabies Act bayat a dagiti narekober a karne ket naiturongen iti National Meat Inspection Service-Cordillera.
