BAGUIO CITY – Maipaspasidong ita iti DNA test ti blood stain samples a kinolektar ti Station 9 ti Baguio City Police Office (BCPO) manipud iti crime scene sadiay Mulberry Alley, Km.4 Asin Road, Baguio City a nakapapatayan ti maysa a taxi driver kalpasan a nabagbagsol ken nahold-up.
Sigun kenni PSI Pablo Emmanuel Nead, commander ti BCPO-Station 9, babaen iti daytoy ket maamuanda no dagiti samples ket dara ti biktima wenno dagiti suspek nangruna ta posible a limmaban ti biktima kadagiti suspek.
Adda met laeng ti naalada nga slipper iti asideg ti construction site a nakasarakan iti biktima ngem kinunana a saan a maibilang nga ebidensia gaputa posible a tagikua ti laborer iti nasao a site ti nasao a banag.
Manarimaan met ti panangadalda kadagiti footages dagiti CCTV cameras iti siudad kas sadiay Slaughterhouse Compound gaputa sadiay ti pagkapkapean ti biktima ken kadagiti dadduma pay a disso a posible a limmabasan ti biktima ken no sadino ti nangilugananna kadagiti suspek.
Kabayatanna, inyapelana ti panangisardeng dagiti taxi ken van iti luganda kadagiti checkpoint ti pulisya tapnu makita dagiti pulis dagiti pasahero dagitoy ken no awan ti malabasanda a checkpoint ket ket lumabasda iti Station 9 ken ilawlawagda laengen kadagiti pasahero a kasapulan ti nasao nga addang.
