BAGUIO CITY – Nakemmeg ti dua a lallaki kalpasan a naaktuwan dagitoy nga agpa-pot session iti uneg ti maysa a van iti kalsada iti asideg ti Benguet AgriPinoy Trading Center (BAPTC) idi kalman.
Binigbig ni PCI Benson Macli-ing, dadaulo ti La Trinidad PNP dagiti dua a da Joshua Dela Cruz, 21-anyos, baro, tubo ti Quezon City ken residente ti Sampaloc, Manila ken ni Dennis Akian, 30-anyos, naasawaan, laborer ken residente ti Mabalacat, Pampanga.
Kinunana a nakaawatda ti tawag manipud iti maysa a maseknan nga umili mainaig iti nalabasanna a panag-pot session dagiti dua a suspek iti uneg ti van nga addaan plaka nga ZEF 457.
Dagus met a nagresponde dagiti pulis ken sadiay a naaktuwanda dagiti dua a manarimaan nga agpa-pot session.
Nakemmeg dagiti dua ken nakumpiskar kadagitoy ti maysa a maysa a naaramat nga aluminom foil, dua a lighter, dua a cellphone ken maysa a wallet.
Inyunay-unay met ni Macli-ing a saan a taga-La Trinidad dagiti dua isut gapuna nga ammuenda ti ranta dagitoy iti panagturongda iti masakupan ti munisipyo.
Naituding a makasuan dagiti dua iti panaglabsing iti Comprehensive Dangerous Drugs Act of 2002, partikular ti Section 11 ken 15 wenno ti panagimet ken panagaramat iti iligal a droga.
