BAGUIO CITY – Namnamaen ni Igorot marathoner Roland Wangwang a nakarekoberen ti bagina sakbay ti 2017 SkyRunning Continental Championship a pasetanna sadiay Japan mangrugi inton bigat agingga inton Dominggo.
Iti panakiuman ti Bombo Radyo kenni Wangwang a tubo ti Bontoc, Mt. Province, kinunana a na-admit daytoy iti pagagasan itay laeng nabiit isut gapuna nga agtultuloy ti panangikondisyonna iti bagina para iti nasao a kompetisyon.
Makaduana iti pasalip ti padana nga Igorot marathoner a ni Marcelino Chana-oy a tubo ti Kabayan, Benguet.
Kinunana a ti pasalip ket pasetan dagiti nagduduma a kampeon manipud nagduduma a pagilian iti Asia a nakaisayangkatan ti culminating event para iti championship.
Innayonna a dagiti bambantay a tarayenda iti nasao a running event ket 2,000 above sea level.
Inton September 9 ket 5-kilometers a pasang-at iti bantay ti tarayenda ken inton September 10 ket 28-kilometers ti tarayenda bayat a naipaayanda iti lima agingga innem nga oras tapno malpas ti nasao a marathon.
