BAGUIO CITY – Agtultuloy ti imbestigasion nga ipatpatungpal ti tropa ti gobierno tapno maduktalan no asino ti akinkukua kadagiti high-powered firearms ken nagduduma a combat equipment a narekober sadiay Sitio Amfayaca, Brgy. Luplupa, Tinglayan, Kalinga.
Nangipatungpal iti operasion ti nagtipon a pwersa ti Regional Public Safety Battalion (RPSB) ken 50th Infantry Battalion ti Philippine Army kalpasaan a nakaawat iti report ti Tinglayan Municipal Police Station maipapan iti nangngeg dagiti umili a putok ti paltog iti mapagin-inagawan a nagbeddengan ti sub-tribes ti Tongrayan ken Tulgao.
Sigun kenni PCI Carol Lacuata, pannakangiwat ti Cordillera-PNP, naduktalan iti imbestigasion dagiti otoridad nga aksidente a naiputok ti saan pay a nabigbig nga indibidual ti paltug daytoy kabayatan ti panagbantayda iti mapagin-innagawan a lugar.
Nakekober dagiti otoridad ti maysa a bushmaster, sagg-gaysa nga M-14, M-16 ken M-79 rifle; 29 a basio ti bala; 8 a magazine ti M-16; 118 a bala ti M-16; 8 a magazine ti M-14; 285 a bala ti M-14; 10 a bala ti 40mm; tallo a Bandolier; ken saggaysa a largabista, radyo ken cellphone.
Naiturong iti ikot ti Kalinga Police Province Office ti tallo a paltog bayat a ti dadduma kadagiti nasao a banag ket naipaima iti 50th Infantry Battalion.
