BAGUIO CITY – Urayen pay ti dadaulo ti Baguio City Police Office wenno BCPO ti imbestigasyon ken ti sungbat dagiti maseknan a personnel ti PNP a mairekreklamo nga agsugsugal iti uneg ti maysa a computer shop ken bilyaran sadiay Kagitingan Barangay, siudad ti Baguio.
Immunan a naiyuman ken naipatulod iti facebook page ti Bombo Radyo Baguio dagiti ladawan dagiti nasao a pulis a nakaiggem iti baraha bayat ti maatap a panagay-ayam dagitoy iti Lucky 9.
Nagkedked pay a mangipaay ti City Director iti komento wenno reaksion iti nasao a pakaseknan.
Maipalagip nga impanamnama iti Bombo Radyo ti maysa a kagawad ti Barangay Kagitingan ti nainget a panangimbestigarda iti nasao nga alegasyon.
Naamuan a ti nasao a pasdek ket kukua ti kabsat ti maysa kadagiti kagawad iti barangay.
Kiniddawda pay a no adda man ti reklamo iti masakupan ti barangay dagitoy ket nasken a maikamang iti barangay hall tapnu dagus a maaksionan dagiti pakaseknan.
