BAGUIO CITY – Umap-apela dagiti maseknan nga umili iti Gumatdang, Itogon, Benguet para iti panagaksion dagiti maseknan a lokal a gobyerno ken ahensia ti gobyerno iti panakarugit ken panagbaliw ti maris ti danum iti Ambalanga River a masarakan sadiay.
Iti reklamo nga indanun ti maseknan nga umili iti Bombo Radyo, makita ti ladawan ti karayan a nagbalin a maris sky blue a mapapati a nagtaud iti carbon-in-pulp wenno CIP discharge a mangsabsabidong iti river system.
Sigun met iti Benguet Corporation, awan ti pakainaigan ti operasyon ti kompanya iti nasao a banag.
Kinuna ni Atty. Froilan Roger Lawilao, dadaulo ti administration department ti kompanya, idi pay 1989 a simmardeng ti operasyonda sadiay Barangay Gumatdang.
Kinunana a posible a ti nangitunda iti panagbaliw iti maris ti danum iti karayan ket ti operasyon dagiti small scale miners sadiay.
Kabayatanna, iti panakiuman ti Bombo Radyo kenni Gumatdang Punong Barangay Benedicta Sagamang, impettengna a kanayon nga ipalpalagipda kadagiti small scale miners sadiay ti panagtungpal dagitoy kadagiti linteg ti panagminas ken iti panakasalwad ti aglawlaw.
Kinuna ni Sagamang a tunggal adda ti taripnong daigti small scale miners iti lugarda ket makitugtugaw dagitoy ken ipalpalagipda dagiti amin a pakaseknan mainaig iti panagminas.
Innayonna a kiniddawda pay ti panangipasdek dagitoy iti Containment Area a pakaiturongan dagiti tailings ken CIP discharge tapnu saan dagitoy nga agturong iti karayan.
Inaklonna a parikutda met ti saan a panagtungpal dagiti maskenan a minero iti pammagbaga dagitoy ken adda dagiti mangirason nga awan ti mangbiag iti pamilyada no maiparikep ti operasyon dagitoy.
Dinakamat met ti kapitana a ti Dalisay Camote Miners Association ti grupo a responsable iti mairekreklamo.
