BAGUIO CITY – Imimbestigaranen ni Mohammad Nasser Abbas, DOTr Cordillera Assistant Regional Director, dagiti alegasyon nga adda dagiti dadakkel a personalidad nga agserserbi a protector dagiti fixers.
Iti panakiuman ti Bombo Radyo, kinuna ni Abbas nga imimbestigaranna ti maatap a panagbalin a protector ti sumagmamano a kameng ti National Bureau of Investigation ken Criminal Investigation and Detection Group kadagiti fixers.
Kagiddan iti daytoy ket binabalawna dagiti immunan a nagtugaw iti DOTr ken LTO nu apay nga awan pay laeng dagiti nakaskasoan a fixers kabayatan ti panagtakem dagitoy.
Inladawanna a bulsek wenno naginbubulsek dagiti nasao nga opisyal gaputa saanda a nakita ti panagraira dagiti fixers sadiay Pacdal.
Gapu iti daytoy ket panggepna a kiddawen ti panangipaulog ni Secretary Arthur Tugade iti memorandum a mangsuspendir iti operasyon dagiti negosyante kas kadagiti agididiaya iti insurance ken medical iti teritoryo ti LTO.
Inyunay-unayna a dagiti negosyante ket nasken nga agtalinaed, sangapulo a metro ti kaadayona manipud iti LTO, ken saanda a rumbeng nga idiktar dagiti rumbeng nga agala iti serbisyo dagitoy.
