BAGUIO CITY – Agtultuloy ti panangmonitor ken koordinasyon ti Office of Civil Defense (OCD) Cordillera kadagiti local disaster risk reduction and management councils ti tunggal probinsya iti rehion mainaig pay laeng iti posible nga epekto ti bagyo nga Odette.
Segun kenni OCD-Cordillera information officer Franzes Ivy Carasi, naibayog iti blue alert ti status ti operations center dagitoy, ken naipasidong iti partial activation kadagiti kasapulan para iti disaster operations.
Kinunana met a maibasar iti pattapatta ti Pag-asa ket agpada ti track ti bagyo nga Odette iti nagbalin a track ni supertyphoon Lawin a dimmalapos ken nangpukaw iti agarup duapulo a biag ditoy Cordillera idi Oktubre ti napalabas a tawen.
Kinunana pay a mabalin a pumigsa ti nasao a bagyo sakbay nga aglandfall inton rabii wenno inton agsapa sadiay Cagayan area.
Dinakamatna met nga iti probinsya ti Apayao ket mapaspasaran ita ti napigsa a tudo, ken immunan a nairikep ti maysa a kalsada sadiay gapu pay laeng iti panagregaay ti daga.
