BAGUIO CITY – Inyunay-unay ti Traffic Enforcement Unit (TEU) – Baguio City Police Office a seryoso dagitoy iti panangipatungpalda iti linteg trapiko.
Kasaruno pay laeng daytoy ti panagbalin a viral iti social media ti video ti maysa a traffic enforcer ti siudad a nagbitin iti ruar ti passengers seat ti maysa a jeep tapnu laeng ikkanna iti citation ticket ti jeepney driver gapu iti kaso daytoy nga obstruction.
Segun kenni PCI Oliver Panabang, dadaulo ti TEU, tiltiliwen ti nasao a traffic enforcer ti maseknan a driver ti Trancoville jeep ngem saan nga inted ti driver ti lisensiya daytoy ken inyabantena ketdi ti luganna.
Saan nga intulok ti traffic enforcer a pumanaw ti jeep isut gapuna a nagbitin iti igid ti jeep tapnu ipaayna ti citation ticket iti driver.
Kinuna ni PCI Panabang nga adu ti mapaspasamak kadagiti kalkalsada a nu mamingsan ket agpeggad pay ti biag dagiti traffic enforcers ngem arigna saan a maawatan ti dadduma a tao ti trabaho dagitoy nangruna dagiti mangkitkita laeng kadakuada.
Iti baet daytoy ket impettengna a ti kinadesidido dagiti traffic enforcers a mangipatungpal iti akem dagitoy ket maysa a wagas tapnu madisiplina dagiti motorista, nangruna dagiti saan a sumursurot iti linteg-trapiko.
