BAGUIO CITY – Matamtaming ita iti pagagasan ti dua a call center agents kalpasan a nadangran dagitoy iti panagdinnungpar ti naglugananda a kotse ken ti maysa a taxi iti Quirino Highway, partikular iti mismo a sango ti Station 1 ti Baguio City Police Office (BCPO) itay parbangon.
Nabigbig dagitoy a da Kenneth Chua Zita, 25-anyos, driber ti kotse, residente ti Pinsao Pilot, Baguio City ken ti kaduana a ni Gabriel Quario Dacumos, 25-anyos, residente ti Irisan, Baguio City
Nabigbig met ti driber ti taxi nga addaan plaka nga AYT 273 a ni Jessie Montero Luntayao, 42-anyos ken residente ti Santo Tomas Proper, Baguio City.
Segun kenni PO3 Jason Rupinta, manipud iti Traffic Accident Investigation Section ti Traffic Enforcement Unit ti BCPO, paturong sadiay Irisan ti kotse nga imanmaneho ni Zita idi napukawan daytoy iti kontrol iti manibela a nangitunda tapnu agturong daytoy iti bangir a linya ti kurba a kalsada.
Kabayatanna, paturong met iti sentro ti siudad ti taxi idi nasabatna ti kotse a nangitunda tapnu agdinungpar dagitoy.
Nadadael ti sango a paset ti dua a lugan gapu iti kapigsa ti panagdinnungparda bayat a naiturong iti pagagasan ti dua a nakalugan iti kotse.
Naamuan a maipasidong ni Zita iti operasyon gapu iti panakaikkat dagiti ngipenna bayat a ni Dacumos ket maipaspasidong pay iti obserbasyon.
Naduktalan pay a naka-inum iti arak da Zita ken Dacumos sakbay ti aksidente.
Inkari met ti ina ni Zita a bayadanda ti nadadael iti nasao a taxi.
