BAGUIO CITY – Agbalballaag manen ti Department of Social Welfare and Development (DSWD) kontra iti panagraira ti human trafficking.
Sigun kenni DSWD – Cordillera Regional Director Janet Armas, adu latta dagiti indibidual a mabikbiktima iti human trafficking.
Kinunana nga idi napalabas a tawen ket dumanon iti 17 nga indibidual a biktima ti human trafficking ti tinulungan ti ahensia.
Maibasar iti listaan, uppat kadagiti nasao nga indibidual ti nagtaud iti rehion Cordillera bayat a ti dadduma ket manipud iti sabali a lugar.
Dinakamatna a kalpasan a naispal dagiti biktima ket dagus dagitoy a naipasidong iti psychological examination ken dadduma pay nga intervention.
Imbalakad pay ni Armas ti dagus a panagkamang dagiti umili kadagiti istasyon ti pulisya ken kadagiti maseknan nga opisina tapno saan dagitoy a mabiktima iti human trafficking.
