BAGUIO CITY – Agtultuloy ti nainget a kampanya kontra iti panagrames ti Benguet Provincial Social Welfare Office.
Segun kenni Juana Banawe, dadaulo ti nasao nga opisina, ita a tawen ket nainget da a tutukan ti nasao a kampanya malaksid pay iti kampanya kontra iti iligal a droga ken responsible parenthood.
Mainaig iti daytoy, kinunana nga idi 2017 ket dumanon iti 55 a kaso ti panagabuso wenno sexual abuse ti nailista dagitoy, nangatnagto no idilig iti 40 idi 2016.
Kinunana a malaksid iti daytoy ket dumanon met iti 14 a kaso ti incest rape a nailista ti opisina.
Inayona a dagiti biktima ket agtawen iti lima pababa bayat a dagiti suspek ket agtawen iti 16 pangato.
Kinunana pay a no maminsan ket mabain ti pamilya dagiti biktima a mangipila iti kaso gaputa kabagianda a mismo ti suspek.
Gapu iti daytoy, ginuyuguy ni Banawe dagiti pamilya ti biktima a mangipilada iti kaso urayno kabagianda ti suspek.
