BAGUIO CITY – Maiyawiden ti bangkay ti konduktor a pimmusay iti panaka-aksidente ti maysa a bus sadiay Bayacsan, Taloy Sur, Tuba, Benguet idi kanikadua.
Sigun iti pulisya, maiyawid ita sadiay Mindoro ti bangkay ni Joseph Ryan Mesana Lalong Isip a temporaryo a naimassayag iti maysa a punerarya sadiay Marcos Highway, siudad ti Baguio.
Kabayatanna, naamuan a nai-cremate met ti bangkay ti pimmusay a baket a nabigbig a ni Melba Suarez.
Nakaruar metten manipud iti pagagasan dagiti amin a nadangran iti aksidente bayat a naipisoken iti pagbaludan ti driver a ni Maximo Alday Jr. a sumangsango iti kaso a reckless imprudence resulting in homicide and multiple physical injuries and damage to properties.
Maipalagip a pasang-at iti siudad ti Baguio ti nasao a bus nga addaan plaka a CXU 533 idi naidungpar daytoy iti poste ti BENECO ken nagtuloy simmang-at agingga a naidungpar iti kongkreto nga alad sakbay nga immatas ken nagsardeng iti kanawan a paset ti kalsada.
Nangitunda daytoy iti dagus nga ipupusay ti konduktor ken ti maysa a pasahero ken iti panakadangran dagiti 19 a pasahero.
