BAGUIO CITY – Mangrugin inton Enero 27, aldaw ti Sabado ti early registration dagiti estudyante a sumrek iti school year 2018-2019.
Sigun kenni Pio Ecuan, dadaulo ti Policy Planning Research Division ti Department of Education – Cordillera, kasapulan a masapa ti panangiparehistro dagiti nagannak kadagiti anakda a sumrek iti pagadalan tapno maliklikan ti panakaladaw dagitoy ken tapno maamuan ti bilang dagiti estudyante ditoy rehiyon.
Kinunana a tunggal pagadalan ket adda dagiti mannursuro a mangtutok kadagiti masapa nga agparehistro ken umawat iti aplikasyon dagiti estudyante.
Innayonna a kas maibasar iti datus ti ahensia, agarup 439,000 ti bilang dagiti estudyante ditoy rehiyon a naka-enroll iti elementarya, sekondarya ken kadagiti state universities and colleges ita a tawen.
Agleppas ti nasao a nasapa a panagparehistro inton Enero 28, aldaw to Dominggo.
