BAGUIO CITY – Pimmusay ti maysa a babae kalpasan a nadungpar ken naatalan ti maysa a dump truck sadiay Suello Village ditoy siudad ti Baguio idi kalman.
Nabigbig daytoy a ni Amanda Moreno, 27-anyos ken residente ti Purok 3, Dontogan, Baguio City bayat a nabigbig met ti driber ti nasao a truck a ni Marcelino Baldas, 24-anyos, awanan asawa ken residente ti Purok 3, Gibraltar, Baguio City.
Segun kenni PSIns. Eliezer Brioso De Vera, dadaulo ti BCPO – Station 10, agbalballasiw ti biktima iti kalsada babaen iti pedestrian lane idi nadungpar ken naatalan daytoy ti nasao a trak.
Kinunana a ti trak nga addaan conduction sticker a 130103 ket naglaon ti darat ken paturong iti lowland.
Dinakamatna a saan a nabartek ti driber ngem kas maibasar iti salaysay daytoy ket saan a nasiputan ti driver nga agballasiw gayam ti babai.
Iti agdama ket ada iti maysa a punerarya sadiay Marcos Highway ti biktima bayat a nakemmeg met ti driber ken manamnama a sumango daytoy iti kaso a reckless imprudence resulting to homicide.
