BAGUIO CITY–Agarup 31,000 a kilo ti manok, baboy ken lames ti nakumpiskar ti City Veterinary Office iti merkado publiko ti siudad ti Baguio idi napalabas a tawen.
Sigun kenni Dr. Silardo Bested, Assistant City Veterinarian, nakumpiskar dagiti nasao a karne ken lames gaputa saan dagitoy a dimmalan iti umno a proseso ken maibilbilangda a mishandled gaputa awananda iti sertipikasyon manipud iti maseknan nga ahensia ti gobyerno.
Kinunana nga ingetanda pay ti panaginspeksion dagitoy iti merkado publiko ti siudad ken kadagiti satellite markets tapnu maliklikan ti panakailako dagiti karne ken lames nga awanan sertipikasyon.
Kagiddan iti daytoy ket inyapelana kadagiti vendors iti siudad ti panangipasigurado dagitoy a dagiti ilaklakoda a karne ti manok, baka ken baboy, pakairamanan dagiti nagduduma a lames ket nadalus ken saan a kontaminado iti bakteria.
