BAGUIO CITY – Pimmusay ti tallo nga indibidual bayat a nadangran ti innem a dadduma pay kalpasan a natnag iti rangkis ti nagluganan dagitoy a parapasahero a van sadiay Cattubo, Atok, Benguet idi malem kalman.
Nabigbig dagiti pimmusay a da Rey Carias Batong, 38-anyos, driver ti nasao a van ken residente ti Guinzadan Norte, Bauko, Mt. Province; ni Mateo Loy-odan Ngade, 34-anyos, mekaniko ken residente ti Tadian, Mt. Province; ken ni Lourdes Payagda Balog-ang, 69-anyos, tubo ti Bila, Bauko, Mt. Province ken residene ti Purok 6, Irisan, Baguio City.
Nadangran met da Jessy Keth Cambolo Panisigan, 6-anyos; Kyra Panisigan Batawang, 4-anyos; Glenda Panisigan Batawang, 41-anyos, bin-ig dagitoy a tubo ti Guinzadan, Bauko, Mt. Province ken residente of Lubas, La Trinidad, Benguet.
Nadangran metlaeng da Marilyn Pacio Tomayo, 41-anyos, residente ti Poliwes, Baguio City; ni Apolonia Pacalso, 68-anyos ken residente Bana-ao, Tadian, Mt. Province; ken ni David Ingaan Caoili Jr., 59-anyos, tubo ken residente ti Bana-ao, Tadian, Mt. Province.
Sigun kenni PCI Ceasar Malong, hepe ti Atok PNP, paturong iti siudad ti Baguio ti nasao a van idi napasamak nga aksidente.
Naamuanda kadagiti nakakita a nag-overtake ti van iti sarsaruenna a truck a nangitunda iti panakatnag daytoy iti derraas nga addaan kauneg nga agarop 300 a metro.
Dagus a naipakammmo iti Atok PNP ti insidente ken timmulong ti DPWH iti rescue operation ngem dead on arrival iti Atok District Hospital da Lourdes Balog-ang ken Mateo Ngade bayat a pimmusay ti driver a ni Batong bayat ti panakatamingna iti nasao nga ospital.
Naiyakar da Apolonia Pacalso ken David Ingaan Jr. iti Benguet General Hospital bayat a naiyakar da Glenda Batawang, Jessy Panisigan ken Kyra Batawang iti Cordillera Hospital of the Divine Grace.
