BAGUIO CITY—Naipaayan iti medalya ti dua a soldado ti 5th Infantry Division ti Philippine Army kalpasan a nadangran dagitoy iti engkwentro iti nagbaetan ti tropa ti gobyerno ken dagiti rebelde sadiay Baay, Pinukpuk, Kalinga idi Enero 23 ti agdama a tawen.
Napadayawan dagiti dua iti naangay a seremonya iti pagagasan iti uneg ti Camp Melchor F. Dela Cruz sadiay Gamu, Isabela .
Mismo a ni BGen Perfecto Rimando Jr, commander ti 5ID ti nangipaay iti Wounded Personnel Medal kada SSgt. Virgilio Jacinto ti Alicia, Isabela ken PFC Keaven Macaiba ti Tinglayan, Kalinga.
Naipaayan pay dagiti dua iti grocery items ken sag-P5,000 kas financial assistance manipud iti Star Trooper Active Relief Fund.
Dinayaw met ni BGen. Rimando dagiti dua a soldado ken dagiti kakadua dagitoy manipud iti 50th Infantry Battalion gapu iti panagbalin dagitoy a banuar a maiparbeng laeng a tuladen dagiti kakaduada.
Imbalakadna pay ti ad-adda a panangpasayaat dagiti soldado iti panagaramidda iti mandatoda a panagserbi iti pagilian ken kadagiti Pilipino.
