BAGUIO CITY – Naibalud ti dua a babae kalpasan a nagtakaw dagitoy iti nagduduma a lako iti uneg ti department store ti kadakkelan a mall ditoy siudad ti Baguio idi kalman.
Nabigbig dagitoy a da Kimberly Quinto Miyazaki, 21-anyos, naasawaan, factory worker ken residente ti Salisay Street, Dagupan City, Pangasinan ken ni Maria Camille Joyce Siapno Peralta, 22-anyos, estudyante ken residente ti Dimalaoan Riverside, Calasiao, Pangasinan.
Maibasar iti report, nasiputan ti gwardiya ti panangala dagiti dua iti nagduduma a lako ken ti panangikabilda kadagitoy iti shoulder bag ni Myazaki sakbay a nagalada iti dadduma a lako ken nagturongda iti fitting room.
Simrek ni Myazaki iti cubicle imetna dagiti lako bayat a naguray iti ruar ni Peralta.
Kalpasan ti sumagmamano a minutos, rimuar ni Myazaki manipud iti fitting room imetna ti shopping basket ken nagturong iti cashier a nagbayadanna kadagiti naikabil iti shopping basket.
Nupay kasta, dagus a kinemmeg ti gwardiya dagitoy ken iti panangkalkalda iti bag ni Miyazaki ket narekober dagiti saan a nabayadan a tagilako pakairamanan ti uppat a t-shirt, maysa a jacket, maysa a paris ti sandal, ken nagduduma a pang-make-up nga addaan pakabuklan a gatad a P5,458.
Impaimada dagiti dua a babae iti istasyon ti pulisya ken iti pammilin ni Duty Prosecutor Christian Amistad ket naipisok dagitoy iti Baguio City Jail.
