--Ads--
BAGUIO CITY – Nailista ti 3.8 magnitude a gingined ditoy siudad ti Baguio iti alas otso kwarentay dos ti agsapa.
Nailanad iti revised data ti Earthquake Bulletins ti Philippine Institute of Volcanology and Seismology a partikular a nailista ti gingined pito a kilometro iti abagatan daya ti Baguio City.
Addaan iti kauneg a 16 a kilometro ti nasao a gingined ken daytoy ket tectonic in origin.
Narikna ti Intensity 4 iti lungsod ti Baguio.
Gapu iti daytoy, sumagmamano a pagadalan ti nangsuspindir iti klase dagitoy.
Nupay awan met ti nailista a dadael gapu iti nasao a gingined, mabalballakadan latta ti publiko iti panagbalin dagitoy nga alerto iti amin a panawen.
