BAGUIO CITY–Posible a maaramat ti dua nga ektraria a lote sadiay Longlong, La Trinidad, Benguet a pagakaran dagiti sigud nga informal settlers ti BIBAK Area ditoy siudad ti Baguio.
Sigun ken ni Bert Sungot, ti agtagikua iti nasao a lote, nakasagana daytoy a mangipaaramat iti dagana kadagiti sigud a nagdappat sadiay BIBAK Area.
Inlawlawagna a naobserbaranna ti rigat dagiti maseknan nga indibidual nga agbirbirok iti pagakaran dagitoy.
Kinunana a kasapulan laeng nga asikasuen dagiti maseknan nga indibidual dagiti kaskenan a dokumento tapno maaramid ti lote kas residential land ken kinunana a saan daytoy a paset ti communal forest ti munisipio.
Kabayatanna, nagyaman ni Freddie Lunyez, maysa kadagiti sigud a settlers ti BIBAK Area kadagiti opisial ti La Trinidad gapu ta naawatanda ti sitwasyon dagitoy.
Dinakamatna a ti Socialize Housing Government Corporation ti gumatang iti lote ni Sungot tapnu mapatakderan iti babbalay ken in-inot dagitoy nga agbayad iti korporasion.
