BAGUIO CITY–Nasarakan ti bangkay ti maysa a mannursuro iti irrigation canal sadiay Maledda, Ipil, Tabuk City, Kalinga idi malem kalman.
Nabigbig daytoy a ni Kenny Makasing Natarte, 33-anyos, baro, Registered Nurse, instructor sadiay Kalinga State University ken residente ti Pinukbalan, Purok 7, Bulanao, Tabuk City, Kalinga.
Sigun kenni San Ubaldo Esteban iti Tabuk City Fire Station, nasarakanda ti nasao a bangkay iti irrigation canal nga agturong sadiay Maledda, Tabuk City kalpasan ti sumagmamano nga oras a panagbirbirukda iti daytoy.
Kinunana a ti laeng rupa ti biktima ti nadunor a posible a resulta ti panakaitugtug daytoy kabayatan ti panakaiyanud daytoy.
Nagtalinaed met a kompleto dagiti kagawaan ti biktima kas iti relo ken sapatos daytoy.
Naamuan nga iti agsapa idi kalman ket naireport ti panakasarak ti motorsiklo ti biktima a natumba iti igid ti kanal nga asideg iti balayda.
Naipasidong met iti otopsiya ti bangkay ken manarimaan ti imbestigasyon iti napasamak iti nasao a mannursuro.
