BAGUIO CITY — Pinaneknekan dagiti rice retailers sadiay Baguio City Public Market nga agkurkurangen ti suplay ti NFA rice.
Sigun iti retailer a ni Rita Kidman, manipud iti 50 kaban a maaw-awatda tunggal lawas ket nagbalin laengen 25 kaban.
Kinunana a dua laeng a kilo ti NFA rice ti mabalin nga ilakoda iti tunggal kustomer tapnu saan a maibus a dagus ti suplay dagitoy.
Nupay kasta, inaklonna a saan latta a malikliklan nga adu dagiti gumatgatang iti NFA rice gapu iti napintas a kalidad daytoy isut gapuna a maib-ibusanda iti suplay.
Nti panagturong ti Bombo Radyo News Team sadiay rice section iti merkado publiko ti siudad, naobserbaran a manipud kadagiti 12 a rice retailers ket maysa laengen ti addaan suplay iti NFA rice.
Naamuan met a ti kaaduan ita gatgatangen dagiti kostumer ket ti whole grain a P45 tunggal kilo ken ti Jasmine a P45 agingga P55 tunggal kilo.
Magatang pay ti Sinandomeng iti P40 tunggal kilo, ti Dinorado iti P42 tunggal kilo, ti Aroma ket P50 tunggal kilo, ti Angelica ket P38 tunggal kilo, ti Borgadul ket 37 tunggal kilo ken ti NFA ricer ket P32 tunggal kilo.
