BAGUIO CITY — Pinaglibakan ti nangabak a bidder iti Baguio Blooms Exhibition and Exposition sadiay Lake Drive, Burnham Park ti alegasyon a nangipaay daytoy iti P1.5 million iti maysa a konsehal ti siudad ti Baguio.
Iti panakiyuman ti Bombo Radyo kenni Mabel Chagwaten, impettengna nga awan ti asinoman nga opisyal ti siudad a nagkiddaw kenkuana iti kwarta para iti operasyon ti market encounter.
Nupay inaklonna nga agpagayamda iti maitudtudo a konsehal, inyunay-unayna met nga iti panangabakna kas bidder iti market encounter ket awan ti aniaman nga akem ti nasao nga opisyal.
Impettengna pay nga awan ti rason tapnu agited daytoy iti kwarta iti maibagbag a konsehal nangruna ta dimmalan iti lehitimo a proseso ti bidding para iti agserbi nga organizer ti Baguio Blooms Exhibition and Exposition.
Sigun pay kenkuana, dakkel ti nabusbosna iti panaka-aramid ti market encounter ken ti nasao nga alegasyon ket maysa laeng a pammadakes wenno panangdadael kenkuana ken iti nasao a konsehal.
