BAGUIO CITY–Nakasagana ti sumagmamano nga overseas Filipino workers (OFWs) sadiay Kuwait nga agawid ditoy Pilipinas.
Mainaig pay laeng daytoy iti panggep a repatriation kadagiti Filipino workers sadiay Kuwait kasaruno ti pammilin ni Presidente Rodrigo Duterte a total ban iti deployment dagiti OFWs sadiay gapu iti pannakaabuso ken pannakapapatay ti sumagmamano a Pilipina sadiay.
Iti pannakipatang ti Bombo Radyo-Baguio ken ni Elijah Caluza a maysa nga OFW sadiay Kuwait, kinunana a nasayaat met ti kasasaadna sadiay gapu ta napintas met ti trato kenkuana dagiti amona malaksid pay a naipangato ti sueldona.
Nupay kasta, impetteng ni Caluza a nasaysayaat latta ti mangged iti bukod dagitoy a pagilian tapno asideg dagitoy kadagiti ipatpategda iti biag.
Kinunana a no mangidiaya ti gobierno ti Pilipinas iti napimpintas a panggedan kadagiti OFWs ket awan dudua nga agawid metten daytoy.
Iti baet daytoy, kinuna ni Caluza nga iti agdama ket anusanna pay laeng ti mangged sadiay Kuwait ngem kinunana nga agawid daytoy ditoy Pilipinas no adda ti manamnama a natalged a pagtrabuanda nga OFWs
