Sinukimat dagiti pannakabagi ti Office of the Ombudsman ti opisina a binakatian ni Senator Jinggoy Estrada kalpasan a naarestar ken naibalud daytoy.
Sigun kenni Senate Secretary Renato Bantug, naipakaammo kenkuana ti inspeksiyon nga insayangkat ti Ombudsman idi kalman ken ti GSIS ocular itay nabiit.
Innayonna nga awan ti naawatna a request manipud iti Commission on Audit (COA) para iti inspeksiyon ngem kiniddaw ti Commission iti Senado nga ilawlawagda ti pagalagadan mainaig iti nasao a banag.
Maipalagip a nadikobre idi Lunes a naabakatian ti nasao nga opisina no sadino,naikkat dagiti amin a kagawaan a pakairamanan ti sockets, tiles, shower, toilet bowl ken dadduma pay.
Naituding a sublaten ni Senator Vicente Sotto III ti opisina kalpasan a sinukatanna ni Estrada kas Senate President Pro Tempore.
Kabayatanna, inlawlawag dagiti staff ni Estrada a ti pannakaikkat kadagiti fixtures ken dadduma pay a materiales manipud iti opisina ti Senado a sigud nga okupado ti maysa a senador ket maysa nga established ken accepted practice.
Maipalagip a naibalud ni Estrada iti Quezon City jail idi Hunio kalpasan nga imbilin ti Sandiganbayan Fifth Division ti pannakaarestarna gapu iti non-bailable charges a plunder.
