BAGUIO CITY–Mangipatungpal ti Department of Education (DepEd)-Baguio iti nagduduma nga interventions ken programa tapno malapdan ti karkaro a panagraira dagiti grupo a maaw-awagan iti hypebeast ditoy siudad.
Iti interview ti Bombo Radyo-Baguio ken ni Baguio Schools Division Superintendent Dr. Federico Martin, kinunana a makitaripnong ti DepEd kadagiti nagannak tapno maipakaammo kadagitoy ti maipapan iti naso a grupo.
Kinunana a makabinnadangda iti kampania kontra iti hypebeast ti Baguio City Police Office ken ti Department of Social Welfare and Development.
Sigun pay ken ni Martin, makipatang met laeng ti DepEd kadagiti opisial dagiti babbarangay para iti pannakikaykaysa dagitoy iti nasao a kampania.
Kinunana a masapul ti pannakitinnulong dagiti babbarangay gapu ta dagitoy dagiti makaammo kadagiti background dagiti residente dagitoy pakairamanan dagiti agtutubo ken estudiante.
Kiniddaw met laeng ti DepEd ti pannakikaykaysa ti religious sector iti kampania kontra hypebeast babaen iti panangtutok dagitoy kadagiti agtutubo tapno maipaayan dagitoy kadagiti sapsapulenda nga atension.
