BAGUIO CITY – Pimmusay ti maysa a turista kalpasan a naatake daytoy iti puso bayat ti panagur-urayna ken ti pamilyana iti panagrugi ti Grand Float Parade idi kalman a maysa a highlight ti Panagbenga 2018.
Sigun iti doktor, pimmusay ti 54-anyos a turista gapu iti myocardial infarction wenno atake iti puso.
Naamuan a ti nasao a turista ket taga-Nueva Ecija.
Immuna iti daytoy, nasapa a nagturong sadiay Session Road ti pamilya ti nasao a turista agbiruk iti napintas a pwesto a pagbuyaan dagitoy.
Bayat nga agur-uray dagitoy, napukawa ti puotna isut gapuna a dagus a naiturong daytoy iti ayan dagiti medics a nakaipatungpalan ti first aid sakbay a naiturong iti pagagasan.
Nupay kasta, sadiay a pimmusay ti nasao a turista gapu iti atake iti puso.
Naituding met a maiyawid sadiay Nueva Ecija ti bangkay ti nasao a turista.
Kabayatanna, sumagmamano met kadagiti nagbuya idi kalman a napukawan iti puot ket naiturong iti pagagasan kalpasan a naipaayan dagitoy iti first aid.
