BAGUIO CITY – Agipila iti mosyon iti korte ti kampo ni Ifugao Representative Teodoro “Teddy” Baguilat Jr. tapnu ipetteng ti karbenganna ti umno a proseso kasaruno ti panakaipila ti kaso kontra kenkuana gapu iti panakagatang ti maatap nga overpriced a second-hand a lugan nga aggatad ti P900,000 bayat ti terminona kas gobernador ti probinsia idi 2003.
Nailanad iti press statement ti kongresista a nagramot ti kaso iti undated ken anonymous letter complaint a naipatulod iti Office of the Ombudsman a nakailanadan ti maatap a naanomalyaan a panakagatang ti lugan idi 2003.
Impetteng ti kampona a nabayagen a naipila iti korte ti motion to dismiss and/or for early resolution of the case ken letter request for case status iti opisina ti Ombudsman idi naipila ti criminal informations sadiay Sandiganbayan idi napalabas a bulan.
Innayon pay ti press statement ni Baguilat a gaputa 13 a tawen ti binusbos ti Ombudsman a nangrisut iti simple a kaso, mamati daytoy nga adda ti inordinate delay wenno awanan rason a panakaipabayag ti kaso isut gapuna nga agipila manen ti kampona iti kaseknan a mosyon iti korte.
Maipalagip a kinasuan ti Office of the Ombudsman ni Baguilat gapu iti panakagatang ti second-hand a wagon trooper iti gatad a P900,000 ngem naduktalan nga awan ti naipatungpal a competitive public bidding a sagudayen ti linteg.
Nailanad pay iti charge sheet nga awan ti proper budget appropriation iti panakagatang ti nasao a lugan ken maatap a naaramid ti Deed of Sale ti lugan sakbay pay a naisagana ti purchase request, canvass report ken ti panakaipaay ti purchase order.
