BAGUIO CITY – Nakemmeg ti maysa a babae bayat a nakalibas ti kaduana kalpasan ti panagtakaw dagitoy manipud iti maysa a pwesto iti market encounter sadiay Burnham Park idi kalman.
Nabigbig ti nakemmeg a ni Sherlyn Nicolas Quizana, 30-anyos manipud San Juan, Cabanatuan City.
Maibasar iti report, nagturong dagiti dua sadiay market encounter, partikular iti maysa a pwesto dagiti badbado ken sadiay a nangalada iti lima a pidaso ti jogger pants nga aggatad amin iti P750.
Nadlaw met ti sales lady ti panangikabil dagiti suspek iti tinakawda nga items iti eco bag nga imet dagitoy.
Kinomprontar ti sales lady dagiti dua ngem dagus dagitoy a timmaray isut gapuna a dagus a nagpaarayat ti sales lady iti naka-duty sadiay a gwardiya.
Kinamat dagitoy ti gwardia a nangitunda iti panakakemmeg ni Quizana a naipaima iti istasyon ti pulisya.
