BAGUIO CITY-Posible a masuspindir ti taxi meter calibration ditoy siudad ti Baguio inton sumaruno a lawas.
Iti panakiyuman ti Bombo Radyo kenni Department of Transportation (DOTR)-Cordillera assistant director Mohammad Nasser Abbas, kinunana a daytoy ket gapu iti adu a reklamo a naawat ti opisinana.
Kinunana nga agturong daytoy ita nga aldaw sadiay Central Office dagitoy tapnu idanun ti pakaseknan dagiti operators a saan a mangkayat iti calibration ken ti resolusyon ti lokal a konseho ti Baguio a mangsupsuportar iti panakasuspindir ti nasao a calibration.
Sigun kenkuana, kinasaritana ni Mayor Domogan ken ni Councilor Bomogao seknan iti posible a panakasuspindir ti nasao a calibration gapu kadagiti reklamo a naawat daytoy.
Maipalagip nga iti intuding ti Land Transportation Franchising and Regulatory Board (LTFRB) ket nangrugin ti calibration dagiti taxi meter idi kalman, partikular dagiti taxi nga addaan plaka nga agleppas iti 1,2 ken 3.
Innayonna a no matuloy ti calibration ket kakaasi dagiti taxi operators ken drivers gaputa ngumina ti plete nga agresulta iti saan a panaglugan dagiti pasahero kadagitoy.
Maipalagip nga iti pammilin ti LTFRB ket kasapulan nga agpamuntar dagiti taxi iti GNSS receiver, wifi, dashcam ken cctv camera sakbay a ma-calibrate dagitoy.
Ditoy rehion Cordillera, iti kanito a ma-calibrate ti metro ti taxi ket agbalin a P35 ti permanente a flag-down rate bayat a manayonan ti plete iti P13.50 tunggal kilometro a nataray ti taxi ken kanayonan a P2 tunggal minuto iti panagbiahe manipud iti nagtaudan agingga iti destinasyon.
