BAGUIO CITY–Ikonkonsidera ti Philippine Military Academy a naidumduma a pakasaritaan ti panagturpos ni Lt. Jaywardene Hontoria kalpasan ti panagbigbig daytoy kas valedictorian ken napili kas Class Baron ti PMA Alab Tala Class of 2018.
Sigun kenni Lt. Col. Reynaldo Balido, panakangiwat ti Philippine Military Academy, napili ti Hontoria kas Class Baron gapu iti nangato nga academic standing daytoy ken iti napintas ti panakilangenna kadagiti amin a kadete ken amin nga opisina iti akademya.
Inlawlawagna a dagiti mapili a Class Baron ket nainget a pilyen dagiti tactical officers ken mairekomendar iti opisina ti PMA Superintendent.
Naamuan a maikatlo pay laeng ni Hontoria a nabigbig a Class Baron iti pakaistoryaan ti Philippine Military Academy.
Gapu iti panagbalinna a kas baron, daytoy ti kaunaan a maital-o iti rangko manipod iti amin a mistah daytoy iti kanito nga agserbi iti armada puersa ti Pilipinas.
Immunan a nabigbig kas Class Baron daydi Cadet Aristeo Ferraren idi 1938 ken ni daydi Cadet Leopoldo Regis iti tawen 1951.
Pinaneknekan ni Hontoria a daytoy ti nangidaulo iti klase dagitoy kalpasan a nagun-odna ti kadduan a pammigbig.
Maibilang met laeng a pakaistoryaan ni Hontoria ti panakikallaysa daytoy iti nobyada a nurse kalpasan a mismo ti graduation rites.
