--Ads--
BAGUIO CITY–Nakamassayag ita iti maysa a punerarya sadiay Bambang, Nueva Vizcaya ti bangkay ti maysa a taga-Benguet a nasarakan a nakasako sadiay Pangawan, Kayapa, Nueva Vizcaya.
Iti panakiyuman ti Bombo Radyo kenni PCI Orlando Tacio, hepe ti Kayapa PNP, kinunana a nabigbig ti biktima babaen iti naala nga identification card iti uneg ti maysa a bag a nasarakan iti asideg ti bangkay.
Binigbigna ti biktima a ni Silvestre Yudong, 45-anyos, addaan asawa ken residente ti Poblacion, La Trinidad, Benguet.
Kinunana a nagsagrap ti biktima iti tama ti bala iti ulo.
Naamuanda pay manipud iti La Trinidad Municipal Police Station a ti biktima ket sigud a balud ken nawayawayaan, tallo a tawenen ti napalabas.
