BAGUIO CITY – Manarimaan pay laeng ti panangberipikar ti COMELEC – Mt. Province iti listaan dagiti 3-termer a barangay officials sadiay a nangipila iti certificates of candidacy (COCs) iti kapada a posisyon para iti masungad a May 14 Barangay ken Sangguniang Kabataan (SK) Elections.
Sigun kenni Atty. Ricardo Lampac, Provincial Election Supervisor ti COMELEC-mt. Province, dagus a madiskwalipikar iti eleksion dagiti nasao a kandidato ken maipilaanda iti kaso a criminal.
Kinunana nga adu pay laeng dagiti maaw-awatda a report manaig kadagiti 3-termer barangay officials a nangipila manen iti COCs ken manarimaan iti panagkampanya dagitoy.
Inlawlawagna a mabalin a makasuan iti perjury dagiti kandidato a maduktalan a nag-ulbod iti panangipilada iti COC ken madusa dagitoy babaen iti panakaibalud ti innem a bulan angingga innem a tawen.
Maibasar iti inisyal a report, dumanon iti 113 a kandidato iti nagduduma a posisyon ti nadiskwalipikar gapu iti panagtakemda iti tallo a nagsasaruno a termino ken iti panagtarayda iti kapada a posisyon iti maikapat a gundaway.
