BAGUIO CITY – Impaulogen ti Mt. Province Provincial Police Office ti ultimatum para iti panakaisardeng ti amin nga operasyon ti iligal a panagminas sadiay.
Nailanad iti pammilin ni PSSupt. Allen Ocden, Provincial Director ti Mt. Province PNP a naipaayan dagiti minero iti 10 nga aldaw tapnu boluntaryo a mangirikep ken mangidulin kadagiti kagawaan dagitoy.
Kinunana nga iti kanito a saan nga agtungpal dagiti maseknan a minero iti nasao a pammilin ket dagus a mangisayangkat ti pulisya ken militar iti operasyon kadagiti nabigbig nga iligal nga operasion dagiti pocket miners.
Inlawlawagna a napilitan daytoy a nangipaulog iti nasao nga ultimatum gapu iti panagraira ti iligal a panagputed kadagiti kayo nga ar-aramaten dagiti minero a poste iti minas dagitoy.
Kagiddan iti daytoy, kidkiddawen ti pulisya ti nainget a partisipasyon dagiti umili ti Montañosa iti kampanya kontra iti iligal a panagminas ken iligal a panagputed ti kayo babaen iti boluntaryo a panangisardengda iti aktibidad dagitoy.
