BAGUIO CITY – Maal-alarma ita dagiti health authorities ditoy Baguio gapu iti killaat a panagngato ti kaso ti human immunodeficiency virus (HIV) infection iti siudad.
Sigun kenni City Health Services Office Nurse Cristina Juan, manipud iti uppat laeng a kaso ti HIV infection idi 2016 ket killaat a ngimmato iti 32 a kaso idi napalabas a tawen 2017.
Kinunana a katukad daytoy ti 700 percent a panagngato ti kaso ti HIV infection iti siudad a nailista ti social hygiene clinic ti opisina dagitoy.
Maibasar iti datus ti City Health Services Office, dagiti nakaptan iti nasao a virus ket dua a lallaki, maysa a masikog ken ti nabatbati a 29 ket dagiti lallaki a nakinanaig iti padada a lallaki.
Innayonna nga idi met January 2018 agingga iti agdama ket nadiskubre ti 10 a baro a kaso ti HIV infection ken amin dagitoy ket dagiti lallaki a nakinanaig iti padada a lallaki.
Inwaragawag ni Nurse V Geeny Anne Austria ti Regional Epidemiology and Surveillance Unit ti Department of Health (DOH) – Cordillera a naipangato iti ‘high risk area’ ti kategorya ti Baguio City, partikular iti aspeto ti panag-adu wenno panagwaras ti HIV.
Sigun kenkuana, gapu daytoy iti killaat a panagngato ti kaso wenno kaadu dagiti tattao iti siudad a naaddaan ti impeksion manipud iti HIV.
Dinakamatna a kapada ita ti Baguio City ti kategorya ti National Capital Region, Cebu ken Pampanga.
Naamuan a nakailista ti DOH-Cordillera iti 301 a kaso ti HIV infection ditoy Baguio manipud iti 405 a kaso ti pakabuklan a rehion manipud 1984 agingga January 2018.
Impalagip pay ni Austria nga agtintinnag iti full-blown Acquired Immune Deficiency Syndrome (AIDS) ti impeksion iti HIV nga agresulta iti ipupusay ti pasyente nangruna no nakaro a naapektaranen ti immune system daytoy.
Ibalbalakad met dagiti health authorities ti kanayon a panang-practice iti natalged ken protektado a panakinaig tapnu maliklikan ti panaka-impeksion manipud iti HIV nangruna no ti partner ket addaan iti nasao a virus.
