BAGUIO CITY – Nakwalipikar iti nalatak a Boston Marathon a maangay sadiay United States inton Oktobre ti maysa nga ultra-marathon runner manipud ditoy City of Pines.
Kasaruno daytoy ti panangiyawid ni Marcelo Bautista iti medalya manipud iti 42 kilometer Honolulu, Hawaii Marathon idi 2017 a pinaseyan ti ginasgasut nga elite runners manipud iti nagduduma a paset ti lubong.
Nagbalin met daytoy a medalist iti nalatak a Waikiki Marathon ken Xterra World Championships iti nasao metlaeng a pagilian.
Gapu iti daytoy, binigbig ti lokal a gobyerno ti Baguio City ni Bautista gapu kadagiti balligi daytoy iti tay-ak ti athletics.
Sigun iti 37-year-old marathoner, tumartaray daytoy iti uneg ti agarup 20 a tawen a nakaur-uranna iti dumanon 180 a medalya ken 20 a tropeyo manipud kadagiti pinaspasetanna a local, regional, national ken international running competitions.
Ni Bautista ket sigud a janitor ti Baguio General and Medical Center ken ita ket maysa a full-time athlete.
Naituding met nga agsubli ni Bautista sadiay Hawaii inton Nobyembre para iti 2018 Edition ti Honolulu Marathon.
