BAGUIO CITY – Tutukan dagiti baro a barangay officials ti manarimaan a panakaiproseso ti panggep a panagtitipon dagiti 128 a babbarangay ti siudad ti Baguio.
Iti panakiyuman ti Bombo Radyo kenni Association of Barangay Council – Baguio City president Michael Lawana, kinunana nga addan ti nabukel a task force a nangtalantan iti umuna a phase ti addang idi napalabas a tawen ken nalpas metten ti panakagrupo-grupo dagiti babbarangay.
Sigun kenkuana, manipud iti agdama a 128 a barangay ket naaramiden ti 34 a baro a barangay ngem naisardeng laeng ti proseso gapu iti napalabas a barangay ken SK elections.
Mangnamnama daytoy nga iti panagtugaw dagiti baro a barangay officials ket maituloy ti nasao a proseso nangruna ta bassit laengen ti maisimpa ket isumitirdan ti plano iti City Council ken iti opisina ti kongresista ti siudad para iti aniaman a kaskenan nga aksion ti Kongreso.
Inyunay-unay manen ni Lawana nga iti kanito a mapagtitipon dagiti barangay ket dumakkel ti maawat dagitoy a pondo tapnu ad-adu met a proyekto ti maaramidda para kadagiti barangay.
Sigun pay kenkuana, no bilang maaprobaran ti plano iti sumaruno a tawen ket saan a dagus a maimplementar gaputa pagsasaritaan pay dagitoy no kaanon to nga agbalin nga epektibo.
