BAGUIO CITY- Temporaryo a nairikep ti Kennon Bridge 2, partikular iti deppaar ti talipapa wenno iti satellite market iti Pias Road, Camp 7 sadiay Kennon Road.
Maibasar iti paka-ammo ti DPWH-Baguio City District Engineering Office, nairikep iti alas sais idi agsapa ti nasao a kalsada ken mailukat daytoy iti alas sais ti agsapa inton June 3 wenno aldaw ti Dominggo.
Panggep ti nasao nga addang a maipaayan iti gundaway ti kontraktor a mangipatungpal iti proyekto a naawagan ti Bridge Program – Widening of Permanent Bridges.
Nailanad iti surat ni OIC-City District Engineer Rene Zarate kenni Mayor Mauricio Domogan nga ipatungpal ti kontraktor ti pile driving operation iti nasao a disso.
Mabalbalakadan met dagiti motorista a magna iti alternatibo a kalsada wenno iti Loakan Road no agturong dagitoy ditoy siudad ti Baguio.
