BAGUIO CITY – Naka-engkwentro dagiti kameng ti 50th Infantry Battalion iti sidong ti Joint Task Force “TALA” ti maysa a grupo dagiti komunista a rebelde a New People’s Army (NPA) sadiay Sibayan, Paco Valley, Kabugao, Apayao idi kanikadua.
Sigun kenni Lt. Col. Isagani Nato, public information officer ti Northern Luzon Command (NOLCOM) ti armada pwersa ti pagilian, manarimaan ti security operation dagiti soldado iti nasao a lugar idi naranaanda ti maysa a grupo a bukbuklen ti agarup nasurok 15 nga NPA a nagresulta iti agarup 30 a minutos a rinnupak.
Dagus met a kinamat ti tropa ti gobyerno dagiti naglibas a rebelde bayat a naipatulod ti kanayonan a pwersa iti nasao a lugar.
Nagresulta manen daytoy iti 10 a minutos a baro a rinnupak iti nagbaetan ti augmentation force kontra kadagiti agliblibas a rebelde.
Nadiskobre met ti militar ti maysa a kampo dagiti NPA nga addaan dua a guard post iti nasao a lugar kabayatan ti ipatpatungpalda a pursuit operation kadagiti rebelde.
Kinuna ni Lt. Col. Nato a mabalin a maka-akomodar ti nasao a kampo iti 40 a rebelde.
Narekober pay ti military ti equipment ken personal belongings dagiti rebelde, pakairamanan ti sumagmamano a paset ti customized bandoleers.
Nagyaman met daytoy gaputa awan ti nadangran iti benneg ti tropa ti gobyerno bayat a dakkel ti pammatida nga adda nadangran kadagiti rebelde gapu iti sayasay ti dara iti nagnaan dagiti nagsanod a rebelde.
Innayon ti NOLCOM nga ituloyda ti Focused Military Operations, nga addaan suporta dagiti umili sadiay tapnu maprebentaran ti aniaman a panangranggas dagiti rebelde kadagiti umili ken iti pananglappedda iti panagdur-as ti komunidad.
