BAGUIO CITY – Nakamemmeg dagiti nagduduma nga unit ti Police Regional Office Cordillera (PROCOR) iti pakabuklan a 16 a wanted persons iti makalawas nga implementasyon ti Oplan Manhunt Charlie.
Sigun iti PROCOR, ti nasao a bilang ket pakairamanan ti dua a Ten Most Wanted Person a nakemmeg idi laeng napalabas a lawas.
Nabigbig dagiti nasao a Most Wanted Person a da Jose Rafer Agnawa, 20-anyos manipud Balsigan Baguio City ken Amador Quilicol Barroga, 42-anyos manipud Bucay, Abra.
Nakemmeg met dagiti 14 a dadduma pay iti nagsisina nga operasyon iti nagduduma a paset ti rehion.
Sigun kenni Regional Director PCSupt. Rolando Nana, resulta daytoy ti nairtengan a kampanya ti pulisya kontra iti kriminalidad a binuyugan ti natibker a suporta ti komunidad.
