--Ads--
BAGUIO CITY – Maan-anop ti lalaki a nangpaltog ken nangdangdangran iti maysa a mekaniko sadiay Calaba, Bangued, Abra idi kalman.
Nabigbig ti suspek a ni John Sawadan a tubo ti Lacub, Abra bayat a nabigbig ti biktima a ni Nickron Reyes, 24-anyos, baro ken residente ti nakapasamakan ti insidente.
Maibasar iti report, aglutluto ti biktima idi pinangpang-or ti suspek ti ulona babaen iti tugaw iti awanan umno a rason.
Rimuar ti biktima tapnu agkiddaw iti tulong manipud kadagiti kaarubada ken idi nagsubli iti uneg ket sadiay a killaat a pinaltogan ti suspek ti biktima.
Nagsagrap ti biktima iti maysa a tama ti paltog iti tiyan ken nagasgas a muging.
Naitaray ti biktima iti pagagasan bayat a mabirbiruk ti suspek ken ti inaramat daytoy nga igam.
