BAGUIO CITY – Pimmusay ti maysa a soldado kalpasan a pinaltogan daytoy ti maysa a lalaki kabayatan ti panagkankantana iti maysa a birthday celebration sadiay Bantay, Cabaroan, Tayum, Abra.
Nabigbig ti biktima a ni Sgt. Antonio Villasurro Alvarez, tubo ti Isabela ken miyembro ti 24th Infantry Battalion ti Philippine Army.
Sigun kenni PSI Ivan Soriano, hepe ti Tayum PNP, posible a nakursunadaan laeng ti suspek a ni Ivan Christopher Nadarisay ti biktima nga agkankanta kabayatan ti selebrasyon ti panagkasangay ti informant dagiti soldado.
Kinunana a kiniddaw ti birthday celebrant ti panagkanta ti biktima ken bayat ti panagkanta ti biktima a soldado iti ‘Bed of Roses’ ket killaat a nagturong ti suspek iti likodanna ken sadiay a pinaltoganna ti ulo ti biktima.
Nagresulta daytoy iti dagus nga ipupusay ti biktima.
Naglibas ti suspek ngem nakemmeg daytoy dagiti nagresponde a pulis.
