BAGUIO CITY – Nakailista ti Provincial Social Welfare and Development Office ti Benguet iti dumanon 45 a kaso ti Children in Conflict with the Law (CICL) manipud Enero agingga Mayo ti agdama a tawen.
Maibasar iti datus ti opisina, nailista ti 27 kadagitoy a kaso ti CICL iti munisipyo ti La Trinidad bayat a naiwaras dagiti dadduma a kaso iti dadduma a munisipyo ti Benguet malaksid laeng kadagiti munisipyo ti Bakun, Buguias, Kabayan, Kibungan ken Tublay.
Kaaduan a naaramid dagiti CICL a kaso ket panagtakaw a dumanon iti 25 a kaso a sinaruno ti panagrames a dumanon iti 7 a kaso bayat a kaaduan kadagiti CICL ket agtawen iti 13 agingga 15 nga adda iti elementary.
Sigun kenni Juana Banawe, dadaulo ti nasao nga opisina, naguyugoy dagiti CICL nga agrames gapu kadagiti mabuybuyada iti telebisyon ken social media ken mabasbasa kadagiti magazines.
Ad-adalenda met no apay a kaaduan a CICL ita ket dagiti sumsumrek kadagiti pagadalan, saan a kas idi a dagiti saan nga agad-adal ti kaaduan a CICL.
Kidkiddawenna pay ti panakikaykaysa dagiti nagannak tapnu malapdan ti panagbalin dagiti ubbing a CICL gapu laeng iti panag-aramidda kadagiti banag a maikaniwas iti linteg.
