BAGUIO CITY – Brutal a pinapatay ti maysa nga agtatakaw ti 8-anyos nga ubing nga anak ti kadkadwana nga agtaktakaw ditoy siudad ti Baguio.
Nabigbig ti suspek a ni Andy Durya, 26-anyos ken tubo ti Pangasinan bayat a ti biktima ket estudyante ti Grade 2 iti Roxas Elementary School.
Sigun kenni PCI Francisco Cacas, station commander ti Baguio City Police Office – Station 5, pinapatay ti suspek ti biktima iti main parking ti Old City Library sadiay Jose Abad Santos.
Kinunana a nasarakanda a nabettak ti ulo ti ubing ken napitpit ti rupa daytoy bayat a nasarakan iti abay ti bangkay ti dakkel ken daradara a bato.
Innayonna nga adalenda ti dadduma nga anggulo ti kaso malaksid iti panagibales gaputa ti nasarakan a bangkay ti ubing ket awanan suot a t-shirt, nakababa ti pantalon ken nakaruar ti pribado a mabagbagi daytoy.
Kinunana pay nga adda ti rekord ti suspek iti nagduduma a kaso ti panagtakaw.
Kabayatanna, inkalintegan ti suspek ti panangpapatayna iti nasao nga ubing.
Iti eksklusibo a panakasarita ti Bombo Radyo-Baguio iti suspek, kinunana a naaramidna laeng ti krimen kas pammales iti inaramid kenkuana ti ama ti biktima.
Inaklonna nga agtaktakaw daytoy kadwana ti ama ti biktima ngem adda ti gundaway a sinaor daytoy ti ama ti biktima no maipapan iti pannakabingay ti tinakawda.
Kinunana a nagapada ken sinaksak daytoy ti ama ti biktima a nagresulta tapno agtubo ti gura iti kaungganna agingga a naaddaan daytoy iti gundaway a nagbales babaen iti panangpapatayna iti nasao nga ubing.
Nupay kasta, impeksa ti suspek ti panagkiddawna iti pammakawan iti pamilya ti biktima.
