BAGUIO CITY – Agpapaimbag ita ti dua a soldado kalpasan a nadangran dagitoy iti nagsina nga engkwentro ti tropa ti gobyerno ken dagiti rebelde a New People’s Army (NPA) iti rehion Cordillera idi kanikadua.
Nakarinnupak ti 81st Infantry Battalion ti Philippine Army ti grupo ti agarup 14 nga NPA sadiay Dandanac, Tamboan, Besao, Mt. Province.
Naamuan a nagtaud iti Kilusang Larangang Gerilya AMPIS dagiti nasao a rebelde nga idadauluan ti managan Ka Digbay.
Nadangran ditoy ti maysa a soldado kalpasan a natamaan ti kanawan a takiag ken ti baba a paset ti likodna bayat a patien ti militar nga adda ti casualty iti benneg dagiti rebelde.
Kabayatanna, nadiskubre met ti 24th Infantry Battalion ti Philippine Army ti napanawan a temporaryo a kampo dagiti NPA iti kabambantayan a paset ti Danac, West Boliney, Abra a mabalin a mangakomodar ti 18 a rebelde ken nasarakanda pay ti nagduduma a kagawaan.
Gapu iti daytoy, nagpatrolya dagiti soldado iti aglawlaw ti nasao a kampo ken kalpasan ti nasurok pito nga oras ket nasalaw ken nakarinnupakda ti 10 a rebelde iti sidong ti Kilusang Larangang Gerilya NORTH ABRA sadiay Ud-udiao, Sallapadan, Abra.
Nagpaut iti 20 minutos ti rinnupak a nagresulta iti panakadangran ti maysa a soldado a natamaan iti kanawan a gurong.
