BAGUIO CITY – Agtultuloy ti search and rescue operation dagiti otoridad tapnu mabirukan ti balasang a naiyanod iti napegges a danum iti kanal iti sangwanan ti maysa a lodge sadiay Marcos Highway, partikular iti Badiwan, Poblacion, Tuba, Benguet idi rabii.
Nabigbig ti balasang a ni Krystel Marlin, 19-anyos, tubo ti Samar, Leyte ken residente ti Loakan, Baguio City.
Maibasar iti imbestigasyon, naaddaan iti nabara nga argumento ti biktima ken ti partner daytoy a ni Marvin Ruiz, 46-anyos, naasawaan, negosyante ken residente ti Binalonan, Pangasinan.
Pimmanaw ti biktima ken nagna iti Badiwan Road ngem sinurot daytoy ni Ruiz tapnu isimpa ti saanda a nagkinnaawatan.
Nupay kasta, napukaw ti biktima ti balansena agingga a natnag iti kanal ken sadiay nga inyanod ti napegges a danum.
Naamuan a nakainom iti arak ti biktima idi napasamak ti insidente.
