BAGUIO CITY–Sumangsango iti kaso a Frustrated Homicide ti maysa a mannalon kalpasan a tinagbatna ti kadwana met laeng a mannalon sadiay Batan, Kabayan, Benguet.
Nabigbig daytoy a ni Dizem Alcido, naasawaan , tubo ti Englandad, Paoay, Atok, Benguet ngem agnanaed sadiay Kabu-uan ,Batan, Kabayan, Benguet.
Nabigbig met ti biktima a ni Ariel Backian Guiad,48-anyos, baro ken residente met laeng sadiay Kabu-uan, Batan, Kabayan, Benguet.
Maibasar iti report, addaan iti susik dagiti dua gapu iti pagin-inagawanda a daga idi killat a tinagbat ti suspek ti biktima.
Nagsagrap ti biktima iti dunor iti kaniggid a lapayagna ken iti kanayan a dakulap daytoy.
Boluntaro met a simmuko ti suspek iti barangay kapitan ti Batan, Kabayan, Benguet sakbay a naiturong iti pulisya.
