BAGUIO CITY–Maiyawiden sadiay Labueg ,Kapangan Benguet ti bangkay ti baro a pimmusay kalpasan a nagaburan iti nagregaay a daga sadiay Km. 73, Amgaleyguey Buguias Benguet idi kalman.
Nabigbig ti pimmusay a ni Christian Asiong Babsa-ay, agtawen iti duapulo ket innem, globe collector ken residente ti Irisan, Baguio City.
Sigun iti kabsat daytoy a ni Kerly Ann Asiong ,maiawid ti bangkayna ita a malem manipud sadiay Abatan Buguias Benguet.
Maibasar iti Buguias Municipal Station,paturong daytoy iti siudad ken nakalugan iti motorsiklo ngem kilaat a nagregaay iti paset ti bantay iti nasao a lugar.
Nadangran ti biktima ken naiyanod agingga iti konkreto a balay iti nasao a lugar.
Kabayatanna,nadangran met ni Sanidad Bacquian Alawas, 57-anyos nga agtagikua ti nasao a balay ken dagiti nakatambay a da Erkin Galino Onio, 31-anyos tubo ti Bedbed, Mankayan ken Winnie Joy Lad-ey Onio, 29-anyos, residente ti Amgaleyguey, Buguias.
Dagos met a naiturong ti paggagasan dagiti biktima iti Northern Benguet District Hospital ngem naiyakar met ni Babsa-ay iti Luis Hora Memorial Hospital gapu iti napasaran daytoy a sugat ti ulona ngem naideklara a pimmusay kalpasan iti sumagmamano nga oras.
